La fracziun dalla PCD ha discutau a Landquart las fatschentas dalla sessiun dil fevrer 2021 e propona unanimamein da suttametter als Grischuns ed allas Grischunas ina votaziun cun duas variantas pil sistem electoral pil Cussegl Grond. L’iniziativa per diminuir il Cussegl Grond sin 90 commembers vegn unanimamein refusada.

Alla sesida da fracziun per la preparaziun dalla sessiun da fevrer a Tavau, per la quala las deputadas ed ils deputai dalla PCD Grischun ein sescuntrai el Forum im Ried a Landquart, ei il sistem electoral danovamein staus in tema. La fracziun dalla PCD pretenda ina votaziun da variantas e vesa ei sco problematic da suttametter sulettamein in model al suveran che sebasa, nota bene, sin in principi che la populaziun ha refusau pliras gadas. Perquei ch’il sistem electoral d’ozildi sto vegnir adaptaus sco consequenza dalla decisiun dil Tribunal federal ei la votaziun da variantas d’impurtonza imminenta. «Suenter che la populaziun Grischuna ha gia pliras gadas refusau l’introducziun d’in sistem cumplettamein da proporz sto il Cussegl Grond proponer al suveran ina varianta nua ch’ei sa vegnir elegiu el maiorz en aschi biars circuits electorals sco pusseivel», s’exprima il president da fracziun Reto Crameri. Proponer allas votantas ed als votants in sistem electoral cun proporz che la populaziun ha repetidamein sfiers seigi nundemocratic e risguarda buc la voluntad dil pievel. Plinavon refusa la fracziun dalla PCD l’iniziativa «Per ina sminuziun dil Cussegl Grond – 90 ein avunda». En in cantun pluriling sco il cantun Grischun cun differentas culturas e differentas orientaziuns economicas, turisticas e socialas drova ei in parlament che representa quella diversitad. Tala vegness eliminada entras ina sminuziun dil parlament. Oravontut en temps incerts sco oz ei stabilitad da gronda relevanza.

La fracziun sustegn la revisiun parziala dalla lescha introductiva pertuccont il Cudisch civil svizzer (per tud. ZGB) che reorganisescha daniev l’autoritad per la protecziun digl affon e da carschis (per tud. KESB) sco uffeci cantunal cun agenturas regiunalas aschia ch’ils process pon vegni optimai ed ils cuosts per mesiras per la protecziun digl affon vegni repartgi solidaricamein sillas vischnauncas. La fracziun critichescha ch’il cantun ha era suenter pliras damondas supplementaras buc fatg indicaziuns fideivlas tier las repercussiuns finanzialas sillas vischnauncas, schegie ch’ei fuss pusseivel d’eruir talas tier las curatellas professiunalas. La fracziun dalla PCD pretenda meglieras informaziuns dalla Regenza aschia ch’ei dat segirtad tgei che pertucca las consequenzas finanzialas dalla revisiun dalla lescha proponida.

Medemamein sustegn la fracziun la revisiun parziala dalla lescha da reorganisaziun dil tribunal cantunal pertuccont la cooptaziun da derschaders. «Las experientschas dils davos onns als tribunals cantunals dil Grischun han mussau che liungas absenzas dil persunal ni ina gliesta da fatschentas excessiva pon menar tier grondas pendenzas e liungas duradas da process. Quellas ein per persunas che ein avisadas sil dretg buc pli tolerablas», resumescha deputau e president da cummissiun Gian Derungs. Culla nova basa sa ina remedura vegnir creada. Per quei motiv sustegn la fracziun dalla PCD la pusseivladad che derschaders supplementars pon vegnir elegi per in temps fixaus. Muort las grondas pendenzas als tribunals cantunals eis ei urgentamein necessari che la revisiun parziala va en vigur ton pli spert aschia che la cooptaziun sa succeder proximamein. Plinavon refusa la fracziun l’iniziativa «Per ina catscha etica e cumpatibla culla natira». La catscha da patenta grischuna ei secumprovada ed ei bein francada ella populaziun. L’iniziativa cun siu intent menass tier in catscha da reschia cantunala tgei che fuss buca competibel cun ina catscha aulta libra el Grischun. Per quels motivs ei la fracziun dalla PCD encunter l’iniziativa.